Hanggang ngayon, hindi pa rin maka-get over ang ilang kibitzers sa naging reaksyon ni Aga Muhlach sa post ng singer-actress na si Lea Salonga.
May kinalaman ito sa pagpanaw ng ace photographer na si Raymund Isaac.
Sa Twitter kasi, nagpahayag ng pagkadismaya ang Broadway diva sa mga tao at celebrities na nagpo-post tungkol sa pagkamatay ng nasabing photographer of the stars.
Para sa kanya, unethical daw ito at dapat ay maghintay raw muna ng kumpirmasyon mula sa pamilya mismo ni Raymund na mag-anunsyo ng balita kesa pinangungunahan pa nila ito.
Banta pa ni Lea, dahil sa pangyayari, parang gusto na raw niyang i-unfriend ng ilang kaibigan.
Tinawag pa niyang assholes ang mga nangunguna sa pagkakalat ng sad news tungkol kay Raymund.
Matatandaang isa kasi si Aga Muhlach sa mga nag-post sa pagkamatay ni Raymund at nagpahatid ng kanyang pakikiramay sa pamamagitan ng kanyang social media account.
May mga nagsabing napikon daw umano ang actor sa kanyang dating love team partner dahil feeling nito ay isa siya sa mga pinarurunggitan ni Lea.
Nakapag-emote rin daw ito na tila di niya bet ang pakikialam ng singer-actress sa pakikiramay niya sa yumaong kaibigan.
May bumabatikos naman kay Lea dahil sa pagkakaalam daw nila ay ang husband ni Raymund na si Jayson Vicente lamang ang maituturing na pamilya nito.
Dagdag pa nila, isang showbiz darling din daw si Raymund dahil sa lovable at amiable personality nito. Hindi maiaalis na mag-react o makiramay ang mga celebrities na inalagaan nito at na-touch ang mga buhay noong nabubuhay pa ito.